ରାଏତ୍ ପାହିଗଲା ସକାଲ ହେଲା
କୁକ୍ରା ଡାକଲା କଁ,
ମଦନ ଵୁଢା ଫୁକରେଇ ଫୁକରେଇ
କରୁଛେ ଘଁଘଁ ।
ଥରଥରି ବୁଢୀ ଛେରା ଦେଇକରି
ଡାକଲା ଵୁଢାକେ ଉଠ,
ଆର୍ କେତେ ଘଡି ଶୁଇସ ଦେଖତ
ସମିଆ ହେଲାନ ମଠ ।
ଆଏଁଖ ରେତିରେତି ଉଠଲା ବୁଢା
ହପକେଇ ଢିପକେଇ ହେଇ,
କାଏଁ ହେଲା ବଲି ଭରମି କରି
ଦୁଆରବନ୍ଧେ ହେଲା ଜୁଗରେଇ ।
ଆଁଠୁ ଯାକର ତାର ଘୁବରୀ ଛାଲ
ଛାଡି ହେଇଛେ ଲାଲ,
ରିଶ୍ମି ହେଇ ଦୌଡି ଯାଇ ଧୈଲା ବୁଢୀର
ଆଘର ଚୁନ୍ଦିର୍ ବାଲ୍ ।
କାଏଁହେଲା ବଲି ବୁଢୀ ପଚରୌଛେ
ବୁଢା ଯେ ଜଜରମାନ୍,
ହିଟିପଡିକରି ଆଇଛେ ବୁଢା
ହେଇକରି ଵଢେ ଟାନ୍ ।
ବୁଢୀର ଲାଗି ବଲି ପାହିଥିଲା ସକାଲ୍
ବୁଢାର୍ ନୁ ପାଏଲା ପାନେ,
ଦୋଷଗୁନା କିଛି ନାଇଁଥାଇ ବି
ଘାଏଲା ହେଲା ବନେ ।

ମନୋଜ କୁମାର ମିଶ୍ର, +919556600105